Þegar notað er glært lakk til að mála með á stensilinn í stað litar verður veggurinn síbreytilegur og lifandi

Annar möguleiki til að nýta sér stenslana er að nota tvo mismunandi litatóna hvern ofan á annan eins og gert var í svefnherberginu í innlit-útlits þættinum. Þá er gljástigið á málningunni það sama en mismunandi litir draga mynstrið fram. Þá er notaður svampur til þess að "dumpa" með á  stensilinn, þannig smitast minna af málningunni undir stensilinn ef maður vil fá alveg hreinar útlínur í mynstrið. Eins er hægt að nota svamprúllu til verksins sem er mun fljótlegra en þá nást ekki fram eins hreinar línur. Til að gera verkið enn léttara er nauðsynlegt að hafa 3M Re-mount límsprey sem fæst meðal annars í Mál og menningu. Þessu er spreyjað á bakhlið stensilsins sem er festur á vegginn á meðan stenslað er. Svo er auðvelt að taka stensilinn af og festa hann á nýjan stað til að halda verkinu áfram. Athugið staðsetningu stensilsins vel þegar byrjað er til þess að lenda ekki í vandræðum með þegar dregur að lokum verksins. Þessu er svipað farið og með flísalagnir; það þarf að byrja á réttum stað til að þetta komi fallega út.

Það má líka alveg hugsa sér að stensla bara rönd þvert á vegginn eða þá lóðrétt og láta þar við sitja.

tengt efni:

• Myndir hengdar upp með borðum
• Áhrif ljóss á liti
• Leiðir til að stílisera heimilið
• Að hengja upp myndir